Lampard: Besta enska landslið sem ég hef spilað með

Chelsea-maðurinn Frank Lampard skoraði tvö mörk í 5-1 sigri Englendinga á Króötum í undankeppni HM í gær og hann var eins og aðrir í skýjunum með frammistöðu liðsins og að England væri komið inn á HM í Suður Afríku.

„Þetta er besta enska landsliðið sem ég hef spilað með ef við lítum á það hvernig liðið er að spila núna," sagði Lampard eftir leikinn.

„Ég hef aldrei verið í landsliðið sem hefur unnið alla sína leiki í undankeppninni. Enska landsliðið hefur oft spilað vel en núna erum við að spila hreint stórkostlega," sagði Lampard.

„Ég er njóta þess á nýjan leik að spila fyrir enska landsliðið og það er svo mikil vinnusemi og leikgleði í liðinu að ég er mjög spenntur fyrir framhaldinu. Við ætlum okkur að gera betri hluti en á síðustu Heimsmeistarakeppni," sagði Lampard en England komst í 8 liða úrslitin á HM í Þýskalandi 2006.

Lampard hrósaði líka Aaron Lennon eins og fleiri í kringum enska liðið og sagði að hann gæti orðið einn af þeim bestu í heimi.