Brynjar Björn: Vel ásættanleg úrslit

Brynjar Björn Gunnarsson leikmaður Reading var fyrirliði íslenska liðsins í kvöld og átti ágætan leik. Hann lék á miðjunni í fyrri hálfleiknum en snemma í síðari hálfleik var hann færður í vörnina í stað Sölva Geirs Ottesen og leysti það hlutverk vel af hendi.

"Ég held að þetta séu vel ásættanleg úrslit. Við vildum auðvitað vinna leikinn sem tókst kannski ekki í dag en við komum vel til baka eftir að þeir komust yfir og vorum í sjálfu sér meira inni í leiknum. Við getum í sjálfu sér sætt okkur við þessi úrslit, miðað við að þeir eru efstir í sínum riðli og jafnvel á leið á HM," sagði Brynjar Björn í samtali við Vísi eftir leik.

"Það voru engir tilburðir í fyrri hálfleik. Við vorum að þreifa okkur áfram, vorum búnir að tapa nokkrum leikjum fyrir þennan leik og byrjuðum á því að prófa aðeins það sem talað var um fyrir leikinn. Það gekk ágætlega, fyrir utan eina skiptið sem þeir opnuðu okkur. Þá hreinsa þeir fram, boltinn fer inn á miðjuna og þeir komast í þremur eða fjórum sendingum að okkar vítateig. Svo kláraði hann færið auðvitað mjög vel," bætti Brynjar við.

Íslenska liðið náði að jafna metin í síðari hálfleik og voru allt eins líklegir til að ná inn öðru marki fyrir leikslok.

"Við vorum sennilega líklegri en þeir til að vinna leikinn. Við pressuðum þá vel og okkur fannst ganga vel hjá okkur í seinni hálfleik. Við komumst nokkuð oft upp kantana en fyrirgjafirnar hefðu oft mátt vera betri eða þá fleiri inni í teignum til að komast í sendingarnar," sagði Brynjar sem er kominn á fullt með Reading í ensku 1.deildinni og langt og strangt tímabil framundan.

"Undirbúningurinn hjá okkur gekk vel, fyrsti leikurinn endaði með markalausu jafntefli, en það eru 45 leikir eftir þannig að það er nægur tími framundan. Útlitið er ágætt en það kemur í ljós eftir 8-10 leiki hvernig liðin eiga eftir að plumma sig. Það eru væntingar í garð liðsins, væntingar til þess að við séum allavega í toppbaráttunni," sagði Brynjar Björn að lokum.