Sigurður Ragnar: Ánægður með liðið

Sigurður Ragnar Eyjólfsson, þjálfari íslenska liðsins, sagðist vera ánægður með sitt lið eftir að það tapaði naumlega fyrir Noregi, 1-0, á EM í Finnlandi í dag.

Tapið þýðir að Ísland kemst ekki áfram í fjórðungsúrslit keppninnar og leikurinn gegn Þýskalandi á sunnudag verður lokaleikur liðsins í Finnlandi.

„Markmiðið var að halda hreinu en við eigum samt að geta skorað og ógnað meira fram á við," sagði Sigurður Ragnar í viðtali í kvöldfréttum Sjónvarps. „Við erum þó lið sem á fleiri varnarsinnaðri leikmenn en sóknarþenkjandi. Því standa okkur færri möguleikar til boða í sókninni. En ég var ánægður með seinni hálfleikinn og hrósaði liðinu eftir leikinn."

„Við megum vera ánægð með þennan leik. Gegn Frökkum fengum við tvö drulluvíti dæmd gegn okkur en í dag spiluðum við almennilegan leik og vorum ekki lakari aðilinn gegn mjög sterkum andstæðingi."

Katrín Jónsdóttir landsliðsfyrirliði var einnig afar svekkt. „Þetta er ótrúlega svekkjandi. Við lögðum okkur 100 prósent fram og áttum meira skilið en við fengum."

„Mér fannst við betri í seinni hálfleik í kvöld og settum þá meiri pressu á þær. En við náðum ekki að skapa nægilega mörg hættuleg færi. Þetta var bara ekki okkar megin í dag."