Holland og Belgía vilja halda HM saman

Knattspyrnusambönd Hollands og Belgíu hafa tekið höndum saman á ný og vilja halda HM í Knattspyrnu 2018 eða 2022. Hollendingar og Belgar héldu einmitt saman Evrópumótið í knattspyrnu fyrir níu árum síðan.

Samböndin ráðgera að byggja tólf nýja knattspyrnuleikvanga og hafa þegar tryggt sér sterka styrktaraðila vegna framboðsins. Þeir munu þurfa á þeim að halda því að það mun kosta milli 60 til 100 milljón evra að byggja hvern völl fyrir sig.

„Það verður mikil samkeppni um að fá að halda HM en við teljum að við séum að bjóða upp á öðruvísi valkost," sagði Harry Been, yfirmaður tilboðsnefndarinnar.

Benelúx-löndin eru ein af ellefu frambjóðendum sem vilja fá stærsta knattspyrnuviðburð heimsins til sín. Hin eru Ástralía, England, Indónesía, Japan, Suður-Kórea, Mexíkó, Katar, Rússland, Bandaríkin og svo sameiginlegt boð frá Spáni og Portúgal.

Næsta HM fer fram í Suður-Afríku næsta sumar og Brasilíumenn munu síðan halda keppnina árið 2014. Það verður síðan tilkynnt í desember á næsta ári hverjir fá að halda HM 2018 og 2022.