Guðjón ánægður með að fá langþráða hvíld

Guðjón Þórðarson, knattspyrnustjóri Crewe, segist afar ánægður að fá loksins smá hvíld en hans menn hafa nú spilað þrettán leiki á aðeins sex vikum.

Crewe tapaði í gær naumlega fyrir Millwall, 1-0, á heimavelli og á enn í harðri botnbaráttu. Liðið hefur engu að síður tekið miklum framförum síðan Guðjón tók við því um áramótin síðustu.

„Leikmennirnir fá nú nokkurra daga frí," sagði Guðjón. „Þetta hefur verið ansi erfið törn fyrir þá. Nú er mikilvægt að þeir hvílist og hugsi vel um sjálfa sig."

Fríið er þó ekki langt. Crewe á næst leik gegn Swindon á laugardaginn næstkomandi.