Umfjöllun: Margrét Lára afgreiddi Serbana

Margrét Lára Viðarsdóttir fór mikinn þegar að Ísland vann góðan sigur á Serbíu, 5-0, í undankeppni HM 2011 á Laugardalsvelli í dag.

Margrét Lára skoraði fjögur mörk í dag en fram að því hafði hún skorað eitt mörk í þeim sjö landsleikjum sem hafa farið fram á árinu.

Fyrsta markið skoraði hún á 32. mínútu beint úr aukaspyrnu eftir að brotið var á Hólmfríði Magnúsdóttur.

Þetta var eina mark leiksins í fyrri hálfleik þrátt fyrir mikla yfirburði í leiknum. Serbarnir komust varla yfir miðju og náðu því ekkert að ógna íslenska markinu.

Síðari hálfleikur var lengst af nokkuð rólegur ef frá er talið annað mark Margrétar Láru á 49. mínútu. Edda Garðarsdóttir tók aukaspyrnu af löngu færi, Katrín Jónsdóttir vann boltann inn í teig þar sem Margrét Lára var mætt, lék á markvörðinn og skoraði í autt markið.

Eftir þetta var lítið að gerast. Íslendingar voru sem fyrr með algera yfirburði á vellinum en nýttu sér þá heldur lítið. Liðið hafði oft spilað miklu betur og greinilegt að liðið var vant því að spila við miklu sterkari andstæðing.

En íslenska liðið lét aldrei undan þrýstingnum og þegar um 20 mínútur voru til leiksloka virtust gestirnir hreinlega brotna niður. Þær máttu þakka fyrir að fá ekki meira en þrjú mörk á sig á lokakaflanum.

Þriðja markið kom eftir hornspyrnu Eddu. Dóra María Lárusdóttir var á nærstönginni og stýrði boltanum út í teig þar sem Margrét Lára skoraði með hnitmiðuðu skoti.

Katrín Ómarsdóttir kom inn á sem varamaður og var nálægt því að skora fjórða mark leiksins. Hún skallaði hornsprynu Eddu að marki en varnarmaður Serba náði að bjarga á línu.

En aðeins mínútu síðar kom fimmta markið. Edda gaf fyrir háan bolta úr aukaspyrnu. Markvörður Serba fór í skógarferð og fyrirliðinn Katrín Jónsdóttir átti ekki í vandræðum með að skora í autt markið.

Margrét Lára skoraði svo fimmta mark Íslands og sitt fjórða með skalla af stuttu færi eftir fyrirgjöf Ernu Bjarkar Sigurðardóttur frá hægri.

Ísland náði því að sína sitt rétta andlit á síðustu 20 mínútum leiksins eftir fremur litlausar 70 mínútur í upphafi leiksins. Vissulega skoraði Ísland tvö mörk en hafa verður í huga að andstæðingurinn var mun lakari en þeir sem bíða í Finnlandi.

Ísland – Serbía 5-0

1-0 Margrét Lára Viðarsdóttir (32.)

2-0 Margrét Lára Viðarsdóttir (49.)

3-0 Margrét Lára Viðarsdóttir (72.)

4-0 Katrín Jónsdóttir (80.)

5-0 Margrét Lára Viðarsdóttir (84.)

Laugardalsvöllur. Áhorfendur: 4154.

Dómari: Tanja Schett.

Skot (á mark): 25-1 (13-1)

Varin skot: Þóra 1 - Vukovic 7.

Horn: 12-0

Aukaspyrnur fengnar: 13-9

Rangstöður: 4-0

Ísland (4-3-3):

Þóra Helgadóttir

Erna B. Sigurðardottir

Katrín Jónsdóttir

Guðrún Sóley Gunnarsdóttir

Ólína Guðbjörg Viðarsdóttir

Dóra Stefánsdóttir

(54. Katrín Ómarsdóttir)

Sara Björk Gunnarsdóttir

(69. Fanndís Friðriksdóttir)

Edda Garðarsdóttir

Dóra María Lárusdóttir

(85. Rakel Hönnudóttir)

Margrét Lára Viðarsdóttir

Hólmfríður Magnúsdóttir