Höskuldur: Ekki komið til móts við framsóknarmenn

Höskuldur Þór Þórhallsson, þingmaður Framsóknarflokksins í fjárlaganefnd, segir að það hafi alltaf verið vilji hjá flokknum að reyna að ná fram þverpólitískri sátt í Icesave málinu. Hins vegar hafi ekki verið komið til móts við flokkinn og því hafi farið sem fór. Allir flokkar nema Framsóknarflokkurinn styðja breytingatillögur meirihluta fjárlaganefndar vegna Icesave.

Frumvarp ríkisstjórnarinnar um ríkisábyrgð vegna Icesave samkomulagsins var afgreitt út úr fjárlaganefnd Alþingis klukkan tvö í nótt með stuðningi allra flokka nema Framsóknarflokks.

Borgarahreyfingin mun skrifa upp á álit meirihluta nefndarinnar en Sjálfstæðisflokkurinn skila séráliti en lýsa því yfir að hann styðji breytingatillögur meirihlutans. Framsóknarmenn styðja ekki breytingatillögurnar og skila séráliti.

Guðbjartur Hannesson, formaður fjárlaganefndar, segir að reynt hafi verið til þrautar að ná samkomulagi við Framsóknarmenn en það hafi ekki tekist.

Höskuldur Þór Þórhallsson, þingmaður framsóknarflokks í fjárlaganefnd, segist hafa upplifað það svo að ekki hafi verið raunverulegur vilji til að semja við flokkinn um lagalega fyrirvara.

„Við fengum ekki tækifæri til að útfæra okkar tillögur. Þeim var hafnað áðan þess að menn vildu skoða þær. Þess vegna fór sem fór," segir þingmaðurinn.

Höskuldur segir að það hafi alltaf verði vilji framsóknarmanna að reyn að þverpólitískri lausn í málinu.

„Það sem gerðist í nótt var í rauninni að að Icesavesamningarnir, sem 3000 manns mótmæltu á Austurvelli, voru samþykktir varla innan samninganna."

Í fyrirvörum meirihlutans er hinu svo kallaða Brussel ákvæði haldið til haga, sem kveður á um að tekið skuli tillit til hinnar erfiðu og fordæmalausu stöðu Íslands. Þá er fallið frá ákvæði um að greiðslur skuli miðast við 3,5% af landsframleiðslu, en þess í stað sett inn ákvæði um þak á greiðslum Íslands, þannig að ef engin aukning verði í landsframleiðslu og hagvöxtur aukist ekki, falli greiðslur niður á því tímabili. Einnig er ákvæðinu sem kennt er við Ragnar Hall hæstaréttarlögmann haldið til haga.

Guðbjartur Hannesson telur að Bretar og Hollendingar ættu að geta unað við þessa fyrirvara. Í þeim sé tekið fram að rísi ágreiningur milli þjóðanna um framkvæmd samningsins skuli sest að samningaborði. Náist ekki niðurstaða þar sé það Alþingis að taka ákvörðun um það hvort ríkisábyrgð ríkissjóðs Íslands vegna samningsins falli niður.