Ríkið leggur fram 1,1 milljarð

Ríkið ætlar að taka þátt í 23 milljóna evra hlutafjáraukningu í Eignarhaldsfélaginu Farice ehf. og leggja fram 6,25 milljónir evra, jafngildi 1,1 milljarðs króna. Heimildar er aflað í frumvarpi til fjáraukalaga.

Að sögn Guðmundar Gunnarssonar, framkvæmdastjóra Farice, er ríkið eini hluthafinn sem hefur skuldbundið sig til að taka þátt í hlutafjáraukningunni, sem var samþykkt í stjórn félagsins í síðustu viku. Ríkið á fjórðung hlutafjár en Landsvirkjun er stærsti hluthafinn með um 29,5 prósent. Afgangurinn er í eigu Skipta, Og Vodafone, Orkuveitu Reykjavíkur og HS Orku.

Farice rekur sæstrengina Farice og Danice, sem tekinn var í notkun í haust.

Danice er enn ekki farinn að skila þeim tekjum sem áætlað var að féllu til á þessu ári. Seinkun á framkvæmdum við gagnaver Verne Holding á Keflavíkurflugvelli er um að kenna, að sögn Guðmundar.

„Það hefur orðið ákveðinn forsendubrestur,“ segir Guðmundur.

„Við erum ekki í vafa um að þessar tekjur muni koma en það er áreiðanlega 6-12 mánaða frestun á því,“ segir hann. Danice mun einnig geta annað þeirri flutningsgetu sem þarf til ef áform bandaríska fyrirtækisins Greenstone um gagnaver við Blönduós ná fram að ganga.- pg