Cole frá keppni í sex vikur

Framherjinn Carlton Cole hjá West Ham United getur ekki leikið með liði sínu næstu sex vikurnar vegna nárameiðsla eftir því sem fram kemur í tilkynningu frá félaginu í dag.

Cole spilaði aðeins 20 mínútur sem varamaður í vináttuleik Englendinga og Slóvaka um síðustu helgi.

"Sem betur fer þarf hann ekki að fara í aðgerð," sagði Gianfranco Zola knattspyrnustjóri West Ham.

Þetta er áfall fyrir Lundúnaliðið sem hefur náð ágætum árangri í vetur, en Cole hefur skorað ellefu mörk á leiktíðinni. Vonir standa til um að hann nái eitthvað að spila áður en tímabilinu lýkur.