Mónakó vann Marseille - Eiður Smári kom inn á 90. mínútu

Mónakó vann glæsilegan 2-1 sigur á útivelli á móti Marseille í frönsku 1. deildinni í fótbolta í kvöld. Eiður Smári Guðjohnsen var settur út úr liðinu fyrir leikinn og kom ekki inn á sem varamaður fyrr en að 20 sekúndur voru eftir af venjulegum leiktíma.

Mörk Mónakó skoruðu þeir Nene og Chu-Young Park og komu þau bæði í fyrri hálfleik. Nene skoraði beint úr aukaspyrnu á 20. mínútu og Park eftir flotta skyndisókn á 41. mínútu.

Marseille var í stórsókn stærstan hluta leiksins en náði aðeins að skora eitt mark og Mónakó-menn fögnuðu frábærum sigri. Mónakó komst með þessum sigri upp fyrir Marseille og upp í 4. sæti deildarinnar.

Eiður Smári kom inn á sem varamaður fyrir Coutadeur á 90. mínútu en það voru tæpum fimm mínútum bætt við leikinn vegna tafa.