Hiddink: Við vorum kærulausir

Guus Hiddink, stjóri Chelsea, var eðlilega ósáttur við endasprettinn hjá sínum mönnum þegar þeir hleyptu Bolton inn í leikinn á ný eftir að hafa náð 4-0 forystu á Stamford Bridge.

Chelsea vann leikinn að lokum 4-3 en Bolton náði sannarlega að gera hann áhugaverðan á lokamínútunum eftir að Chelsea-liðið hreinlega sofnaði á verðinum.

"Við vorum dálítið lengi í gang en náðum svo að keyra upp hraðann. Í stöðunni 4-0 áttum við frekar að bæta við en hitt, en þá duttu menn í kæruleysi - ekki bara í öftustu línu, heldur um allan völl. Menn verða að halda áfram að stýra leiknum," sagði Hiddink í samtali við Sky.

Hann var ánægður með Fílstrendinginn Didier Drogba sem heldur áfram að blómstra síðan Hollendingurinn tók við liðinu.

"Hann heldur áfram að skora og það er gott fyrir liðið. Þegar hann er eins hungraður og hann er að sýna núna, er það gott fyrir alla."