Höfum ekki efni á Jo

David Moyes, stjóri Everton, segir að félagið eigi ekki möguleika á að kaupa brasilíska framherjann Jo frá Manchester City. Félagið hafi einfaldlega ekki efni á honum.

Jo var kominn alveg út í kuldann hjá Manchester City þegar hann gekk í raðir Everton sem lánsmaður í janúar, en Everton-menn hafa verið í miklum vandræðum með að fylla hjá sér framlínuna í vetur vegna meiðsla lykilmanna þar.

Jo sló heldur betur í gegn frá fyrstu mínútu með Everton og hefur þessi 22 ára gamli piltur skorað fimm mörk í sjö leikjum fyrir þá bláu.

"Það þarf ekkert að ræða þetta. Hann kostar mikla peninga og við eigum þá ekki til. Það er á hreinu," sagði Moyes þegar hann var spurður hvort til greina kæmi að kaupa Jo.

"Hann hefur staðið sig ótrúlega vel og skorað mörk og ef einhver hefði sagt mér að við gætum fengið mann að láni sem myndi skora fimm mörk fyrir okkur - hefði ég þegið hann með þökkum," sagði Moyes.

Jo kostaði nýríka City-menn 18 milljónir punda þegar hann var keyptur til félagsins, en skoraði aðeins þrjú mörk í 18 leikjum sínum með liðinu.