Hröktu ráðherra úr púlti

Ragna Árnadóttir dómsmálaráðherra varð frá að hverfa eftir að hróp voru gerð að henni á ráðstefnu í Háskóla Íslands í gær.

Mótmælin eru talin tengjast öðrum sem boðuð höfðu verið vegna brottvísunar fjögurra útlendinga til Grikklands í vikunni. Mótmælt var við heimili dómsmálaráðherra á miðvikudagskvöldið. Þá sóttu að sögn lögreglu um tuttugu manns mótmæli á Lækjartorgi í gær. Mótmælendurnir halda því fram að aðbúnaður hælisleitenda í Grikklandi sé óviðunandi og óforsvaranlegt að senda hælisleitendur hér þangað.

Anna Pála Sverrisdóttir, þingmaður Samfylkingar, spurði dómsmálaráðherra út í málið á Alþingi á fimmtudag. Þar áréttaði Ragna að brottvísun hælisleitenda væri byggð á lögum og almennum mælikvörðum. Ekki væri um geðþótta­ákvörðun ráðherra að ræða.

 „Hvort sem mönnum líkar betur eða verr er lagaumhverfið þannig að við erum aðilar að Dyflinnar-samstarfinu sem byggist á því að þegar eitt Dyflinnar-ríki endursendir fólk til annars ríkis er það vegna þess að hælismeðferð fer þá fram í því ríki sem það er sent til,“ sagði Ragna og benti á að Norðurlöndin endursendu öll hælisleitendur til Grikklands.

Þá sagði Ragna mál allra flóttamanna vera skoðað gaumgæfilega og benti á að flóttamannahjálp Sameinuðu þjóðanna hefði komist að þeirri niðurstöðu að aðstæður í Grikklandi hefðu breyst svo til hins betra að óhætt væri fyrir flóttamenn að snúa aftur þangað. Hún vísaði einnig til skýrslu sem ráðuneytið birti í sumar vegna ákvörðunarinnar um að endursenda fólk til Grikklands.

Í skýrslunni kemur fram að skoða eigi hvert tilvik fyrir sig og kanna aðstæður „og meta með hliðsjón af fyrirliggjandi upplýsingum um aðstæður hælisleitenda í Grikklandi hvort þess megi vænta að viðkomandi muni njóta réttinda sinna sem hælisleitandi þar í landi“.

Rósa Dögg Flosadóttir, settur forstjóri Útlendingastofnunar, staðfestir að Dyflinnar-reglugerðinni sé ekki fylgt fortakslaust heldur séu mál könnuð í samræmi við það vinnulag sem lagt er upp með í skýrslu dómsmálaráðuneytisins. Dæmi séu um að ákveðið hafi verið að senda fólk ekki þangað vegna þess að það hafi fallið undir skilgreiningar skýrslunnar.