Arsenal búið að losa sig við Senderos - á leið til Everton

Philippe Senderos er á leiðinni til Everton í ensku úrvalsdeildinni en svissneski miðvörðurinn er ekki inn í framtíðarplönum Arsene Wenger, stjóra Arsenal þótt að hann sé nýbúinn að selja miðvörðinn Kolo Toure til Manchester City.

Philippe Senderos var í láni hjá ítalska liðinu AC Milan á síðasta tímabili en þessi 24 ára og 190 sm svissneski landsliðsmaður kom til Arsenal árið 2003 og hefur leikið 64 deildarleiki með liðinu.

Fréttir af vistaskiptum Philippe Senderos til Goodison Park eru staðfestar á heimasíðu svissneska knattspyrnusambandsins en þar er sagt að hann sé viss um að þau muni hjálpa honum að vinna sér sæti í HM-liði Svisslendinga. Meiðsli Phil Jagielka hjá Everton munu örugglega sjá til þess að hann spili mikið framan af tímabili.

Arsene Wenger keypti belgíska miðvörðinn Thomas Vermaelen frá Ajax fyrr í sumar og Senderos hefur litið svo á að hann ætti ekki möguleika á byrjunarliðssæti en hann átti eitt ár eftir af samningi sínum við Arsenal.