Héraðsdómur: Fá bætur vegna harkalegrar handtöku

Þremur ungum mönnum voru í dag dæmdar bætur í Héraðsdómi Reykjavíku þegar lögregla braut gegn meðalhófsreglu þegar gerð var á þeim líkamsleit í kjölfar handtöku. Lögreglan var vopnuð og beitti við handtökuna óþarflega særandi aðgerðum og á niðurlægjandi hátt að mati dómara. Mennirnir fá í bætur 200 þúsund krónur hver að viðbættum vöxtum. Gjafsóknarkostnaður sækjanda, 600 þúsund krónur, greiðist úr ríkissjóði.

Málavextir eru þeir að í júlí 2007 voru mennirnir í bíl á ferð um Kópavog þegar þeir eru stöðvaðir af lögreglumönnum og beindu þeir byssum að þeim og skipaði þeim að stíga út úr bílnum. Þeim var gert að leggjast í götuna og þeir handjárnaðir. Löregla hafði fengið tilkynningu um að mögulega hafi verið hleypt af haglabyssu í húsi við Hafnarbraut. Mennirnir voru allir fluttir í handjárnum á lögreglustöðina við Hverfisgötu þar sem mennirnir segjast hafa verið gert að berhátta sig og að síðan hafi verið gerð á þeim líkamsleit. Skýrsla lögreglu í málinu getur ekki um að framkvæmd hafi verið á þeim leit.

Í dóminum segir að telja verði að aðgerðir lögreglu sem beindust gegn stefnendum hafi verið óþarflega harkalegar eins og á stóð og ekki séð að tilefni væri til þess harðræðis sem þeir voru beittir. Því verði að fallast á að ekki hafi verið gætt meðalhófs við handtökuna. „Þá verður og að fallast á það með stefnendum að líkamsleit á stefnendum, eins og hún var framkvæmd, hafi verið alls óþörf." Þá segir einnig að eins og atvikum hafi verið háttað verði með engu móti séð að nauðsynlegt hafi verið að berhátta stefnendur til að leita á líkama þeirra og í fötum að meintu skotvopni.

Þá bendir dómari á að legið hafi fyrir samkvæmt gögnum málsins að tilkynnt hafði verið á lögreglustöðina, áður en komið var með stefnendur þangað, að málið væri afgreitt og því ekki tilefni til líkamsleitar á mönnunum.

„Rannsóknaraðgerðir af því tagi sem stefnendur voru látnir sæta að óþörfu voru til þess fallnar að valda þeim miska, sem þeim ber, samkvæmt framansögðu, að fá bætur fyrir," segir einnig og því bætt við að hæfilegar bætur séu 200 þúsund krónur auk dráttarvaxta.