Campbell vill stöðugleika

Líklegt er að Sol Campbell muni finna sér nýtt félag eftir að hann lýsti því yfir að hann væri ekki ánægður með atburði utan vallar hjá Portsmouth.

Yfirtaka á félaginu á enn eftir að ganga í gegn og því á enn eftir að ganga frá ráðningu nýs knattspyrnustjóra fyrir næsta tímabil.

Campbell er 34 ára gamall og samningur hans við Porsmouth rann út nú í sumar. Hann hefur helst verið orðaður við Aston Villa.

„Mér standa nokkrir möguleikar til boða en ég ætla að hlusta á fleiri tilboð. Ég vil taka rétta ákvörðun. Ég vil koma mér vel fyrir hjá einu félagi næstu 2-3 árin."

„Það virðist vera mikið að gerast á bak við tjöldin hjá Portsmouth og það getur vel verið að það leysist fljótlega. En hvað mig varðar sem leikmann skiptir það mestu máli að vera í réttu umhverfi."