Teitur og lærisveinar hans komnir í úrslit

Skagamaðurinn Teitur Þórðarson stýrði Vancouver Whitecaps til 3-3 jafnteflis gegn deildarmeisturunum í Portland Timbers í úrslitakeppni Norður-amerísku USL-1 deildarinnar í nótt en með jafntelfinu vann Whitecaps tveggja leikja rimmuna samanlagt 5-4.

Marcus Haber, Martin Nash og Marlon James skoruðu mörk gestanna í Whitecaps en síðustu tíu mínúturnar voru æsispennandi þegar staðan var jöfn 3-3 en vörn Whitecaps náði að halda út.

Um verður að ræða kanadíska úrslitarimmu þar sem Whitecaps mætir Montreal Impact í úrslitunum en fyrri leikur liðanna af tveimur fer fram á aðfararnótt sunnudags.

Whitecaps eru núverandi deildarmeistarar en leið þeirra að úrslitunum á þessu tímabili hefur verið löng og ströng þar sem meiðsli lykilmanna hafa gert liðinu erfitt fyrir en liðið er búið að vera ósöðvandi í úrslitakeppninni og aldrei að vita nema Teitur kræki í sinn annan titil á tveimur árum með liðið.