Danir úr leik á EM

Riðlakeppninni á EM kvenna í Finnlandi lauk í dag með tveimur leikjum í C-riðli. Eftir það var ljóst að Danmörk, sem lék í A-riðli, komst ekki áfram í fjórðungsúrslitin.

Úkraína, Ísland og Rússland urðu í neðstu sætum sinna riðla og komust því ekki áfram. Tvö þeirra þriggja liða sem urðu í þriðja sætinu komust áfram en Danir urðu að bíta í það súra epli að komast ekki áfram þrátt fyrir að ná þremur stigum og verða í þriðja sæti A-riðils

Noregur (3. sæti B-riðils) og England (3. sæti C-riðils) hlutu bæði fjögur stig og komust því áfram í fjórðungsúrslitin.

Í dag unnu Ítalir 2-0 sigur á Rússum í C-riðli. Á sama tíma fór fram leikur Svía og Englendinga en honum lauk með 1-1 jafntefli. Faye White kom Englendingum yfir með skallamarki á 28. mínútu en Victoria Svensson jafnaði metin fyrir Svía tólf mínútum síðar eftir að dómarinn dæmdi umdeilda vítaspyrnu, Svíum í hag.

Fjórðungsúrslitin fara fram síðar í vikunni og þá mætast eftirfarandi lið:

3. september:

Finnland - England

Holland - Frakkland

- sigurvegarar leikjanna mætast í undanúrslitum

4. september:

Þýskaland - Ítalía

Svíþjóð - Noregur

- sigurvegarar leikjanna mætast í undanúrslitum