West Ham og Fiorentina gera með sér leikmannaskipti

Samkvæmt heimildum Sky Sports fréttastofunnar er enska úrvalsdeildarfélagið West Ham búið að ná samkomulagi við ítalska úrvalsdeildarfélagið Fiorentina um leikmannaskipti.

Framherjinn Savio Nsereko mun að öllu óbreyttu ganga til liðs við Fiorentina og varnarmaðurinn Manuel Da Costa fer í hina áttina en aðeins er um lánssamninga að ræða, til að byrja með að minnsta kosti.

Nsereko er U-21 árs landsliðsmaður Þýskalands og hefur ekki tekist að aðlagast enska boltanum eftir komuna frá Brescia í janúar og hefur til þessa aðeins tekið þátt í tíu leikjum með Lundúnafélaginu.

Da Costa er U-21 árs landsliðsmaður Portúgal hefur að sama skapi ekki náð að festa sig í sessi hjá Fiorentina og var á láni hjá Sampdoria á seinni hluta síðasta keppnistímabils.