Sir Alex: Sumarkaupum er lokið

Sir Alex Ferguson, knattspyrnustjóri Manchester United, hefur ítrekað að félagið muni ekki kaupa fleiri leikmenn í félagaskipaglugganum. Þrátt fyrir að hafa fengið 80 milljónir punda frá Real Madrid fyrir Cristiano Ronaldo og að hafa misst Carlos Tevez til erkifjendanna í Manchester City ætlar Ferguson ekki að eyða meiri peningum.

Hann festi kaup á Antonio Valencia fyrir 16 milljónir punda auk þess sem Michael Owen kom á frjálsri sölu. Liðið hefur aðeins skorað eitt mark í tveimur leikjum gegn minni spámönnum í deildinni, Birmingham sem United vann 1-0 og Burnley sem United tapaði fyrir.

United hefur verið sterklega orðað við sóknarmenn, nýverið sérstaklega við David Villa og David Silva hjá Valencia.

„Sagði ég að ég myndi kaupa fleiri leikmenn? Þetta er allt og sumt. Ég er búinn að svara þessu og ég er alveg viss í minni sök. Ég er með frábæran hóp leikmanna,“ sagði Ferguson í dag.