Vopnið enn rannsakað og rætt við vitni

Lögreglan rannsakar enn gögn sem aflað var á morðvettvanginum í Dalshrauni á þriðjudag. Þá er enn verið að ræða við vitni úr húsinu. Rannsóknin er þó langt komin. Ekki fæst uppgefið hvort Bjarki Freyr Sigurgeirsson, grunaður morðingi, hefur játað glæpinn eða hvort hann man yfir höfuð eftir því sem gerðist.

Lögregla vill ekki gefa upp hvað Bjarki er talinn hafa notað til að myrða fórnarlambið og segir morðvopnið enn í rannsókn. Heimildir blaðsins herma að um eldhústæki hafi verið að ræða, líklega samlokugrill, sem hafi verið mölbrotið og illa farið eftir barsmíðarnar.

Bjarki var í annarlegu ástandi þegar hann var handtekinn eftir að hafa bankað upp á hjá nágranna sínum alblóðugur en rólegur og tilkynnt honum að félagi hans hefði slasast við að leika Köngulóarmanninn.

Samkvæmt heimildum Fréttablaðsins var Bjarki Freyr í mikilli óreglu. Hann átti það til að taka muldar sjóveikitöflur í nefið, en það hefur sterk vímuáhrif. Þá keypti hann reglulega bjór, tappaði honum sykurblönduðum á plastflöskur og lét hann gerjast frekar til auka áfengismagnið.

Tekin var formleg skýrsla af Bjarka á þriðjudag en ekki er búið að yfirheyra hann síðan. Eins og áður segir fæst ekki uppgefið hvort Bjarki hefur játað morðið en samkvæmt heimildum blaðsins þykir málið liggja tiltölulega ljóst fyrir. Bjarki mun sæta gæsluvarðhaldi til 1. september hið minnsta.