Ferðalagið gekk vel hjá stelpunum - Norðmenn ánægðir með íslenska hótelið

Íslenska kvennalandsliðið flaug í dag til Finnlands og gekk ferðalagið eins og í sögu. KSÍ gerði þó sínar ráðstafanir eftir vandræði Serbanna á leiðinni til Íslands og því voru allar íslensku stelpurnar með takkaskónna í handfarangrinum.

„Það gekk allt vel. Það var bara ein taska sem skilaði sér ekki," sagði Ómar Smárason, fjölmiðlafulltrúi íslenska kvennalandsliðsins sem er komið upp á hótel í Tampere í Finnlandi.

„Við erum á sama hóteli og Norðmennirnir eru á og þeir eru búnir að vera í tvo daga og finnst þetta vera alveg frábært hótel," sagði Ómar sem viðurkenndi þó að hann hafi bara verið að koma inn um dyrnar og eigi því eftir að leggja dóm á það sjálfur.