Margfalt fleiri karlar en konur

Fleiri útlendingar fluttust frá landinu en til þess á fyrstu þremur mánuðum ársins. Er það í fyrsta sinn síðan árið 1992, sem einnig var kreppuár, að sögn Ólafar Garðarsdóttur, dósents við Háskóla Íslands og doktors í fólksfjöldafræði.

Fjöldi útlendinga sem fluttust til Íslands margfaldaðist á árunum 2004 til 2008. Fram að því höfðu á bilinu 600 til 1.800 manns flust hingað árlega. Árið 2004 komu rúmlega 2.500 manns hingað til lands, en hámarkinu var náð árið 2007 þegar rúmlega 9.300 manns fluttu hingað.

Í fyrra fór metfjöldi útlendinga einnig úr landi. Miklu fleiri erlendir karlar en konur fóru af landi brott en hlutfall meðal Íslendinga var nánast jafnt. Sú þróun skýrist af því að árin 2004 til 2008 komu miklu fleiri erlendir karlmenn til landsins en konur. Mælingar Hagstofunnar ná aftur til ársins 1986, en frá þeim tíma og fram til 2004 fluttu mun fleiri erlendar konur en karlar til Íslands. „Það er ekki fyrr en í þensluframkvæmdum, 2004, sem karlarnir verða fleiri en konurnar,“ segir Ólöf. Þessir karlar eru nú í miklum mæli að fara af landi brott.