Phil Brown sektaður

Phil Brown, knattspyrnustjóri Hull í ensku úrvalsdeildinni, hefur verið áminntur og sektaður um ríflega 400 þúsund krónur fyrir framkomu sína eftir rifrildi við Joe Kinnear stjóra Newcastle þann 14. janúar.

Þeir Brown og Kinnear hnakkrifust á hliðarlínunni og voru báðir sendir upp í stúku. Brown gekkst við kærunni og fór fram á fund með aganefndinni, en slapp við bann.

Joe Kinnear er enn að jafna sig eftir hjartaaðgerð og því verður mál hans ekki tekið fyrir strax.

Brown missti stjórn á sér í leiknum eftir að honum þótti Fabio Coloccini leikmaður Newcastle ganga full hart fram í leiknum. Hull vann leikinn 1-0.