Efast um að Alþingi ráði við endurreisn efnahagslífsins

Steingrímur J. Sigfússon fjármálaráðherra segist efast um getu Alþingis til að ráða við það verkefni að endurreisa efnhag landsins. Áframhaldandi óvissa í kringum Icesave málið gæti þýtt að lánshæfi Íslands verði lækkað niður í ruslflokk.

Önnur umræða um Icesave frumvarp ríkisstjórnarinnar hefur nú staðið yfir á Alþingi í tvær vikur. Á meðan hafa önnur mál ekki komist á dagskrá.

Stjórnarandstaðan vill fresta umræðunni en ríkisstjórnin leggur mikla áherslu á að klára Icesvave málið sem fyrst.

Samningaviðræður mili formanna flokkanna hafa hingað til siglt í strand og því má segja að pattstaða ríki nú á Alþingi.

„Ég gerist æ meira hugsi yfir því, dag frá degi, hvort Alþingi hreinlega ráði við sitt hlutverk við þessar erfiðu aðstæður. Hér bíður gríðarleg vinna sem tengist afgreiðslu fjárlaga, tekjuöflun, sparnaðarráðstöfunar margt sem gera þarf í þeim efnum fyrir áramót og þjóðin hlýtur að ætlast til þess að af þjóðþinginu að það reynist eins og aðrar stofnanir í samfélaginu vandanum vaxið," segir Steingrímur.

Hollendingar og Bretar geta sagt Icesave samkomulaginu upp einhliða á miðnætti. Erlend matsfyrirtæki bíða nú eftir því að Alþingi afgreiði málið en áframhaldandi óvissa gæti þýtt að lánshæfi Íslands verði lækkað niður í ruslflokk. „En það mun fara að vaxa hér mjög tortryggni á ýmsum vígstöðvum ef þetta mál er áfram í einhverri óvissu eða upplausn," segir Steingrímur. Matsfyrirtæki og erlendar fjármálastofnanir bíiði eftir því að botn fáist í þetta mál.

„Þunginn í þessu máli er sá að með því að samþykkja þetta frumvarp erum við að gangast undir alveg gríðarlega miklar fjárhagslegar skuldbindingar fyrir íslenska þjóð og það gerir það að verkjum að við látum ekki keyra okkur áfram öðruvísi en svo að við erum búin að fara í gegnum málið og ræða það nægilega vel hérna í þinginu," segir Illugi Gunnarsson, þingflokksformaður Sjálfstæðisflokksins um málið.