Cruyff verður landsliðsþjálfari Katalóníu

Knattspyrnusamband Katalóníuhéraðs á Spáni hefur ráðið Hollendinginn Johan Cruyff til að gerast þjálfari „landsliðs" Katalóníu.

Þetta verður fyrsta þjálfarastarf Cruyff síðan hann hætti sem knattspyrnustjóri Barcelona árið 1996. Hann býr enn í borginni og starfar sem ráðgjafi hjá félaginu.

Knattspyrnusamband Katalóníu er ekki hluti af Alþjóða knattspyrnusambandinu, FIFA, eða Knattspyrnusambandi Evrópu, UEFA.

Landsliðið hefur þó spilað næstum 200 leiki síðan 1904, síðast í desember í fyrra þegar liðið vann 2-1 sigur á Kólumbíu. Leikurinn fór fram á Nou Camp, heimavelli Barcelona.

Meðal leikmanna sem voru valdir í leikmannahóp liðsins fyrir þann leik má nefna Börsungana Victor Valdes, Gerard Pique, Carles Puyol, Sergio Busquets og Bojan Krkic. Meðal annarra leikmanna má nefna Joan Capdevila, leikmann Villarreal og Marc Crosas hjá Celtic.