Fimm menn detta úr byrjunarliðinu - Eiður fær frí

Ólafur Jóhannesson landsliðsþjálfari tilkynnti í kvöld að alls verða fimm leikmenn ekki með í vináttulandsleiknum gegn Georgíu á miðvikudaginn sem voru í byrjunarliðinu gegn Noregi í kvöld.

Sölvi Geir Ottesen þurfti að fara meiddur af velli og segir Ólafur ljóst að hann nær ekki leiknum gegn Georgíu. Sölvi hefur mátt glíma við meiðsli í nára og munu þau hafa tekið sig upp nú.

Eins og ákveðið var fyrirfram fara þeir Aron Einar Gunnarsson og Rúrik Gíslason í U-21 landsliðshóp Íslands sem spilar gegn Norður-Írlandi ytra á þriðjudaginn.

Þá fengu þeir Brynjar Björn Gunnarsson og Eiður Smári Guðjohnsen frí hjá landslðsþjálfaranum.

„Það kom ósk frá Eiði Smára um frí. Hann er nú að koma sér fyrir á nýjum stað og með nýju liði. Við ákváðum í samráði við hann og aðra að verða við ósk hans," sagði Ólafur í kvöld.

„Brynjar Björn er kominn á efri ár og er nýbúinn að vinna sér fast sæti í byrjunarliði Reading. Það er mikið af leikjum framundan og eftir að hafa rætt þetta við hann tók ég þá ákvörðun að hann fengi einnig frí."

Tveir leikmenn verða kallaðir í íslenska hópinn í þeirra stað en hann vildi ekki gefa upp hvaða leikmenn það eru. Átján leikmenn verða í íslenska landsliðshópnum á miðvikudaginn, sagði Ólafur.