Drillo eyðilagður eftir leikinn

Það var afar þungt hljóð í Egil „Drillo" Olsen, landsliðsþjálfara Norðmanna, eftir leikinn gegn Íslandi í kvöld.

Leiknum lauk með 1-1 jafntefli og sagði Olsen að Ísland hefði spilað betur en hann átti von á. „Það kom mér á óvart hversu vel Ísland spilaði. Þeir voru betri en ég hélt. Þeir voru með meiri líkamlegri styrk og unnu flest návígin sem var afar mikilvægt."

„Úrslit leiksins eru mér afar mikil vonbrigði," sagði Drillo. „Við eigum nú enga raunhæfa möguleika á að komast á HM. Þótt við myndum ná öðru sætinu í riðlinum eru tíu stig einfaldlega ekki nóg til að komast í umspilið. Ég er mjög svekktur."

„Leikur okkar féll í sundur eftir að við skoruðum. Við vorum í miklum vandræðum með Eið Guðjohnsen og skildum eftir allt of mikið pláss á milli varnar og miðju."

„Við reyndum að breyta um leikstíl á miðjunni með skiptingunni í hálfleik. Það hjálpaði eitthvað en ekki nógu mikið. Okkur gekk betur að vinna okkur inn í leikinn en ekki nóg til að vinna leikinn."