Loksins unnu Skotar aðra en Íslendinga

Skotland vann í dag 2-0 sigur á Makedóníu í riðli Íslands í undankeppni HM 2010. Liðið á því enn möguleika á að komast í undankeppni HM 2010 en Makedónía er nánast úr leik.

Leikurinn fór fram á Hampden Park í Glasgow en það voru gestirnir sem voru mun sterkari aðilinn í fyrri hálfleik þar sem Goran Pandev fór á kostum. En þeim tókst ekki að færa sér yfirburðina í nyt og staðan var markalaus í hálfleik.

Eitthvað hefur George Burley sagt við sína menn í hálfleik því það var allt annað að sjá til þeirra þá. Þeir voru mun sterkari og það kom því ekki gegn gangi leiksins þegar að Scott Brown kom þeim yfir með skallamarki og hans fyrsta marki fyrir skoska landsliðið.

James McFadden skoraði svo síðara mark Skota eftir að hafa leikið vörn Makedóníu grátt og innisglaði sigur Skotanna.

Þetta er þriðji sigur Skota í undankeppninni en hinir tveir komu gegn Íslandi. Þetta er einnig fyrsti sigur Skota síðan að Burley tók við - fyrir utan sigrana á Íslandi.

Skotar eru nú komnir með tíu stig í riðlinum og þeir vona sjálfsagt að Íslendingar muni gera þeim stórgreiða og vinna Norðmenn í kvöld.

En Skotar þurfa þó helst að vinna Hollendinga í lokaumferð riðlakeppninnar á miðvikudaginn til að komast í umspilið, óháð því hvernig öðrum leikjum lýkur í riðlinum. Hollendingar eru með fullt hús stiga eftir sjö leiki og unnu öruggan 3-0 sigur á Japan í vináttulandsleik í dag.