Ólafur: Við erum betri en Norðmenn

Ólafur Jóhannesson landsliðsþjálfari var mjög ánægður með frammistöðu sinna manna gegn Noregi í kvöld. Ísland var óheppið að vinna ekki en leiknum lauk með jafntefli, 1-1.

„Mér fannst við spila fínan leik og fannst nánast vera eitt lið á vellinum. Það var með ólíkindum að hafa ekki náð að klára leikinn. Heppnin var sannarlega ekki með okkur. En ég er samt hrikalega sáttur við frammistöðu minna manna."

Frammistaða norska liðsins kom honum ekki á óvart í kvöld.

„Ég held að við séum ekkert lakari en þeir. Við erum betri en Norðmenn í fótbolta. Við þorum að spila boltanum út á vellinum. Oft höfum við verið hræddir við að halda boltanum en nú fengum við mikið pláss og spiluðum vel."

Hann segir þó því ekki að neita að fimm stig séu heldur rýr uppskera nú þegar að þátttöku Íslands í undankeppni HM 2010 er lokið.

„Við vorum ekki sáttir við þá tilhugsun að enda með fjögur stig. Við vildum þrjú stig í kvöld enda stór munur á sjö stigum og fjórum. Við áttum möguleika á að bjarga andlitinu en það tókst ekki. En frammistaða liðsins sýndi að ástandið er betra en stigafjöldinn segir."

Hann neitar því ekki að leikurinn í kvöld hafi verið nokkuð dæmigerður fyrir þátttöku Íslands í undankeppninni. Frammistaðan betri en árangurinn sýnir.

„Skotaleikarnir voru ekki ósvipaðir þessum leik nema að þessi var betri. Við vorum óheppnir að tapa báðum leikjunum gegn Skotunum en þar skorti okkur smá heppni. Sama óheppni var viðloðandi okkur í kvöld. Vissulega er þetta dæmigert fyrir gengið okkar en spurningin er af hverju þetta er svona. Við hefðum viljað fá fleiri stig."