Ég er með blessun Wenger

Emmanuel Adebayor segist vera með leyfi frá Arsene Wenger, knattspyrnutsjóra Arsenal, til að spila með landsliði Tógó gegn Kamerún í undankeppni HM 2010 um helgina.

Adebayor hefur verið frá í nokkrar vikur vegna meiðsla og héldu enskir fjölmiðlar því fram að Adebayor hafi verið valinn í landsliðið í óþökk Arsenal.

Sjálfur segist hann hins vegar orðinn heill heilsu fyrir leikinn á morgun. „Þessi fjölmiðlaumfjöllun hefur komið mér á óvart því þetta er ekkert mál," sagði Adebayor í samtali við fréttastofu BBC.

„Stjórinn minn, Arsene Wenger, gaf mér leyfi til að koma hingað og spila. Ef ég hefði ekki fengið hans blessun væri ég ekki hér."

„Ég mun spila með mínu landsliði á morgun og ég er fullviss um að ég muni ekki lenda í neinum vandræðum þegar ég sný aftur til Englands."