Burley: Við erum einfaldlega betri en Makedónar

Landsliðsþjálfarinn George Burley hjá Skotlandi er kokhraustur fyrir leikinn gegn Makedóníu í 9. riðli undankeppni HM 2010 á Hampden Park-leikvanginum á morgun en leikurinn er algjör lykilleikur í baráttunni um annað sæti riðilsins.

„Við vitum að Makedónar eru með sterkt lið en ef ég á samt að vera hreinskilinn þá verð ég að segja að við erum einfaldlega með betra lið en þeir. Við vissum að riðillinn yrði erfiður en þetta er í okkar höndum og við þurfum bara að sjá til þess að við vinnum þá leiki sem við eigum eftir," segir Burley.

Talið er næsta víst að ef Skotar ná ekki að komast í umspilið um sæti á lokakeppninni þá muni Burley vera látinn fjúka. Neikvæð úrslit gegn Makedónum á morgun gætu líka orðið endalok Burley í starfi landsliðsþjálfara Skota.