Umfjöllun: KR-ingar stálu stigunum í Keflavík

KR-ingar sóttu þrjú mjög góð stig til Keflavíkur í dag í leik þar sem Keflavík misnotaði tvær vítaspyrnur en KR vann leikinn, 2-1.

Leikurinn fór rólega af stað en eftir að KR-ingar fengu fyrsta færið á fimmtu mínútu hresstust leikar og leikurinn opnaðist. Keflvíkingar sóttu mun meira og fengu góð færi sem ekki nýttust.

Eftir skemmtilegar 20 mínútur datt leikurinn niður í miðjuþóf og ekkert gerðist fyrr en sex mínútur voru til leikhlés. Þá fengu KR-ingar gott færi sem Lasse varði og aftur opnaðist leikurinn upp á gátt og eins og áður voru Keflvíkingar aðgangsharðari en inn vildi boltinn ekki fyrr en annars góður markvörður KR gerði mikil mistök.

Eftir góða skyndisókn fengu Keflvíkingar víti þegar Andre Hansen tók Símun Samuelsen niður í teignum og var Norðmaðurinn heppinn að fá ekki að líta rauða spjaldið því hann var aftasti maður KR-inga. Guðmundur Steinarsson skoraði af öryggi úr vítinu. Það var síðasta spyrna hálfleiksins og Keflavík, 1-0, yfir.

Keflvíkingar hófu seinni hálfleikinn mun betur en á 57. mínútu breyttist gangur leiksins með marki. Gunnar Örn Jónsson skoraði glæsilegt mark af löngu færi, óverjandi fyrir Lasse Jörgensen.

Tveimur mínútum síðar komst Óskar Örn í gott færi sem misfórst og mínútu síðar kom Björgólfur Takefusa KR yfir eftir góðan undirbúning Gunnars Arnar. KR-ingar virtust ætla að láta kné fylgja kviði og gera út um leikinn næstu mínúturnar en náðu ekki að nýta fín færi.

Keflvíkingar áttu erfiðara með að skapa sér færi eftir mark KR en fengu engu að síður tvær vítaspyrnur sem Guðmundur Steinarsson klúðraði báðum. Sú fyrri á 77. mínútu og sú síðari á 83. mínútu. Nær komust Keflvíkingar ekki og stigin þrjú fara því til KR sem er nú 10 stigum á eftir FH en eiga einn leik til góða.

Keflavík-KR 1-2

1-0 Guðmundur Steinarsson (víti) ´45

1-1 Gunnar Örn Jónsson ´57

1-2 Björgólfur Takefusa ´60

Sparisjóðsvöllur. Áhorfendur: 850

Dómari: Eyjólfur M. Kristinsson 4

Skot (á mark): 15-15 (8-5)

Varið: Lasse 3 – Andre 7

Aukaspyrnur: 14-18

Horn: 4-5

Rangstöður: 2-4

Keflavík 4-5-1:

Lasse Jörgensen 6

Guðjón Árni Antoníusson 5

Alen Sutej 6

Haraldur Freyr Guðmundsson 5

Nicolai Jörgensen 4

(72. Haukur Ingi Guðnason -)

Magnús Sverrir Þorsteinsson 6

Jón Gunnar Eysteinsson 6

Einar Orri Einarsson 7

Hólmar Örn Rúnarsson 5

(87. Sverrir Þór Sverrisson -)

Símun Eiler Samuelsen 6

Guðmundur Steinarsson 4

KR 4-5-1:

Andre Hansen 8 Maður leiksins

Skúli Jón Friðgeirsson 5

Grétar Sigfinnur Sigurðarson 6

Mark Rutgers 4

Jordao Diogo 6

Gunnar Örn Jónsson 7

(80. Guðmundur Reynir Gunnarsson -)

Bjarni Guðjónsson 7

Baldur Sigurðsson 6

Atli Jóhannsson 6

Óskar Örn Hauksson 5

Björgólfur Takefusa 6

(87. Guðmundur Benediktsson -)