Stelpurnar voru myndaðar í bak og fyrir af ljósmyndara UEFA

Íslenska kvennalandsliðið mættu í íslensku landsliðsbúningunum frá toppi til táar á liðsfund á hótelinu sínu í Tampere í kvöld. Ástæðan var að á staðinn var mættur sérstakur ljósmyndari frá UEFA til þess að taka opinberar myndir af stelpunum fyrir Evrópumótið sem hefst á mánudaginn.

Stelpurnar voru meira segja á takkaskónum sínum inn í fundarsalnum en strax á eftir myndatökunni var liðsfundur og stelpurnar voru því í fullum herklæðum á honum.

Ljósmyndari UEFA byrjaði á því að taka hópmynd af öllu liðinu en tók síðan einstaklingsmyndir af öllum leikmönnum í númeraröð. Aðrir íslenskir fjölmiðlamenn fengu einnig að vera á staðnum til þess að fylgjast með og taka líka myndir sjálfir.

Allir yfirgáfu þó salinn á meðan Sigurður Ragnar Eyjólfsson, landsliðsþjálfaði, talaði við stelpurnar í 40 mínútur og fór væntanlega yfir hernaðaráætlunina í fyrsta leik sínum á EM.

Íslenska liðið mætir því franska í fyrsta leiknum sínum á mánudagskvöldið. Myndirnar af stelpunum okkar verða örugglega löngu komnar inn á heimasíðu Evrópumótsins í Finnlandi en opnunarleikur mótsins verður á milli Úkraínu og Hollands á morgun.