Wenger gefur í skyn að Henry muni snúa aftur

Framherjinn Thierry Henry hjá Barcelona viðurkenndi nýlega í viðtölum við spænska fjölmiðla að hann hafi mikinn hug á að snúa aftur á fornar slóðir til Arsenal í framtíðinni.

Nú hefur knattspyrnustjórinn Arsene Wenger hjá Arsenal einnig játað að líklegt sé að Henry muni koma til Arsenal á nýjan leik, en ekki endilega sem leikmaður.

„Ég get vel séð það gerast," sagði Wenger þegar hann var spurður út í mögulega endurkomu Henry til Arsenal og bætti við: „Það er eðlilegt að hann og jafnvel fleiri leikmenn sem hafa sett jafn mikinn brag á Arsenal og hann muni snúa aftur til félagins til þess að vinna fyrir það með einhverju móti.

Kannski fæ ég tækifæri til þess að vinna með þeim eða jafnvel vinna fyrir þá ef við horfum enn lengra fram í tímann," er haft eftir Wenger í breskum fjölmiðlum.