Vinnur fyrstu plötu sína í kapphlaupi við dauðann

„Ég hélt ég hefði allan tíma í heimi. Allt lífið. Og hef það náttúrulega,“ segir Hallvarður Þórsson tónlistarmaður með meiru og bregður fyrir sig gráglettni.

Hallvarður Þórsson vinnur að sinni fyrstu sólóplötu í kapphlaupi við sjálfan dauðann. „Ég greindist fyrir tveimur vikum með illkynja „aggressívan“ krabba í miðjum heila. Hann er 4. stigs, eða á lokastigi. Læknarnir segja að ég eigi þrjár til sex vikur. Kannski meira. Ég er opinn fyrir kraftaverki. Horfurnar eru óvissar og þetta veltur á ýmsu. Og svo er ómögulegt að segja um guðlegt inngrip,“ segir Hallvarður sem er 46 ára.

Hallvarður flutti til Bandaríkjanna um aldamótin og hefur búið á Washington-svæðinu allar götur síðan. Í Bandaríkjunum fann hann ástina og giftist Hope Henry Thorsson árið 2002. Hann á tvö börn og tvö stjúpbörn.

„Ég fór á milli Íslands og Bandaríkjanna um tíma. Ég þurfti að flytja frá Íslandi. Mér gekk illa þar og vildi koma fjölskyldu minni og málum í horf. Skipuleggja líf mitt upp á nýtt. Koma verkefnum af stað og byrja að blómstra,“ segir Hallvarður. Hann stofnaði útgáfufyrirtækið Brave World Production Inc. og er formaður þess fyrirtækis. Undanfarin ár hefur Hallvarður að mestu starfað sem sölumaður hjá verktakafyrirtækjum í Bandaríkjunum. „Já, selt þjónustu sem tengist „home improvements“ sem er stór iðnaður hér. Vanti þig nýtt þak á húsið, sólpall, glugga, verönd, „waterproofing system“ eða eitthvað annað er náungi eins og ég sendur á svæðið til að fara yfir hvað þarf að gera, hanna og ganga frá samningi um framkvæmd verksins.“ En líf hans og yndi er tónlistin og ljóðlist.

„Tónlistin, ljóðin og list mín er líf mitt. Ég hef alltaf gert ráð fyrir miklum tíma hér á jörðinni til að sinna því. Ég hef haft ólíkan metnað varðandi félagslega viðurkenningu en ýmsir samferðamenn mínir. En ég er með mína fyrstu plötu í smíðum núna. Ég gaf nýlega út „single“ með tveimur lögum, „The Night“ og „The Feast of Ecstasy“ auk þriggja ljóða, „The Lake“, „Rainbow, part one, RED“ og „Penthouse“. Brave World Pro-duction hefur ekki gengið frá samningum um útgáfu á þessu né öðru efni við nokkurt fyrirtæki þegar þetta er sagt,“ segir Hallvarður. Sem er eðlilega slappur og orkulaus veikindanna vegna en dregur hvergi af sér og eyðir ekki miklum tíma í svefn. Hallvarður er í kapphlaupi. En stendur ekki einn.

Náinn samstarfsmaður hans í tónlist frá upphafi og meðhöfundur sumra verkanna er Einar Kr. Pálsson. Gunnlaugur Briem er trommari bandsins og Kristján Einarsson verkfræðingur var fyrsti umboðsmaður Hallvarðs og hefur verið inni í myndinni frá upphafi. „Sem skáld er við hæfi að ég yfirgefi þetta líf í það næsta og kveðji með verkum mínum. Gangi frá ljóðunum áður en þetta heilaæxli, sem greindist á páskadag 12. apríl, tekur mig frá vinum mínum og fjölskyldu. Tónlistin er tileinkuð öllum sem hafa haft áhrif á mig og snert líf mitt. „You don"t see me crying“ þegar ég geng frá þessum lögum og læt með því þá vita sem ég elska að ég er að fara í ferðalag.“

jakob@frettabladid.is