Þjónusta lögreglunnar mun skerðast

Boðaður niðurskurður í lögreglunni í ár og á næsta ári, nái hann fram að ganga óbreyttur, mun augljóslega koma niður á þjónustustigi lögreglunnar um allt land, segir í ályktun stjórnar Landssambands lögreglumanna . Lögreglan mun þurfa, enn frekar, að forgangsraða verkefnum sínum og ljóst að einhverjum þeim verkefnum, sem lögreglan er að sinna í dag mun ekki verða sinnt á næsta ári.

„Landssamband lögreglumanna er mjög vel meðvitað um það ástand sem uppi er í þjóðfélaginu í dag, kannski betur en mörg önnur stéttarfélög, því það voru jú félagsmenn LL sem tóku við reiði fólksins í landinu framan við Alþingi Íslendinga í „búsáhaldabyltingunni" svokölluðu, í upphafi þessa árs. Þar rigndi yfir lögreglumenn grjóti, saur, þvagi, málningu, matvælum ýmis skonar o.fl. miður skemmtilegum „flugskeytum"," segir í ályktun lögreglumanna.

Stjórn Landssambands lögreglumanna bendir á að félagsmenn séu í nákvæmlega sömu sporum og aðrir launþegar þessa lands, með sínar fjárhagslegu, sem og aðrar, skuldbindingar. Lögreglumenn velti því nú alvarlega fyrir sér, samanber þær fregnir sem komið hafa af úrsögn félagsmanna LL, úr svokölluðum mannfjöldastjórnunarhópum lögreglu, hvoru megin línunnar þeir muni standa komi til annarrar „búsáhaldabyltingar" í haust eða vetur.