Ólína: Það er öllum sama hvernig maður spilar þegar að maður tapar

Ólína Guðbjörg Viðarsdóttir átti mjög góðan leik á móti Norðmönnum í gær og var besti maður íslenska liðsins. Hún segir góða frammistöðu ekki skipta miklu þegar leikirnir tapast.

„Þetta var stöngin út. Á heildina litið þá erum við ekkert óánægðar með frammistöðu liðsins þannig séð en það var ekki nóg til þess að vinna og þess vegna er maður svekktur. Það er öllum sama hvernig maður spilar þegar að maður tapar. Það eru úrslitin sem segja aðalsöguna," sagði Ólína.

„Við náðum að sækja svolítið meira á þær í seinni hálfleik og vorum þá hættulegar og hefðum átt að gera það allan tímann. Við hefðum þurft að fá vítamínssprautuna strax og keyra á þær. Það dugði ekki til núna," sagði Ólína en hún tók mikinn þátt í sókninni í seinni hálfleik.

„Ég náði að koma meira með í sóknina en ég hef verið að gera. Það er alltaf hættulegt þegar bakvörðurinn kemur upp og svo gengur það í sumum leikjum og í sumum ekki," sagði Ólína og bætir við:

„Það er skemmtilegri bolti þegar við náum að sækja svona. Ef við náum að pressa framar þá kemur miklu meira út úr okkur og þá verða þetta meiri hlaup og meiri barátta sem er miklu skemmtilegra. Ég gæti farið út á völl núna og spilað á móti Þjóðverjum og keyrt á þær," sagði Ólína.

Framundan er lokaleikur íslenska liðsins á móti gríðarsterku liði Þjóðverja. „Núna stemmir maður sig bara upp í að vinna heimsmeistarana og það getur ekki verið erfitt að mæta tilbúinn í svoleiðis leik. Það væri sigur útaf fyrir sig að gera eitthvað stórt á móti þeim," sagði Ólína að lokum.