Margrét Lára: Við eigum heima hérna á EM

Margrét Lára Viðarsdóttir er búin að vera í mjög strangri gæslu á Evrópumótinu og hefur því fengið úr litlu að moða. Hún segir frammistöðu liðsins á móti Noregi hafa átt skilið stig.

„Maður er gríðarlega svekktur. Það þekkja það allir sem setja sér há markmið og ef maður nær þeim ekki þá er maður skotinn svolítið niður á jörðina. Það var samt margt jákvætt hjá okkur og við megum ekki gleyma því," sagði Margrét Lára.

„Maður skapar sína eigin heppni og óheppni í þessu en ég sé leikinn þannig að betra liðið tapaði í dag. Það er ekki spurt af því heldur er spurt af því hverjir skora mörkin. Það lið sem skorar fleiri mörk vinnur leikina og það er bara skemmtilega staðreyndin við fótbolta," sagði Margrét Lára.

Hún er ánægð með keppnina þrátt fyrir að íslenska liðinu hafi ekki tekist að ná í stig. „Það er margt jákvætt í þessu og við eigum að vera stoltar af því að vera í þessu liði. Þetta er búin að vera frábær keppni. Við verðum reynslunni ríkari eftir hvern leik og við erum að bæta okkur," sagði Margrét Lára og hún horfir til framtíðar.

„Það má heldur ekki gleyma því að við erum með ungt lið og fáa leikmenn sem eru eitthvað að fara að hugsa um að hætta á næstu árum. Framtíðin er björt hjá okkur og við munum koma reynslunni ríkari heim," sagði Margrét Lára.

„Fólk kemur í leiki á móti okkur og heldur að við pökkum bara í vörn. Ég held að við höfum sýnt það í þessari keppni að við höfum mikið gott fram að færa. Við eigum heima hérna á EM," sagði Margrét Lára.