England hélt vonum sínum um að komast áfram í fjórðungsúrslit EM í Finnlandi á lífi með 3-2 sigri á Rússum í dag.
Rússar komust í 2-0 forystu í leiknum strax í upphafi en þær ensku neituðu að játa sig sigraða og náðu að komast yfir áður en fyrri hálfleik lauk. Ekkert mark var svo skorað í síðari hálfleik.
Sigurmarkið var skrautlegt. Markvörður Rússanna, Elena Kochneva, sparkaði boltanum fram völlinn en beint á Smith sem var á miðjum vellinum. Hún tók boltann umsvifalaust niður og dúndraði knettinum aftur að markinu. Kochneva náði ekki til boltans sem hafnaði í netinu.
Svíar tryggðu sér fyrr í dag sæti í fjórðungsúrslitunum enda liðið með sex stig eftir tvo leiki í C-riðli. England og Ítalía eru með þrjú stig en Rússland ekkert.
