Katrín: Ekki að vinna út á vellinum en búin að vinna stúkuna

Katrín Jónsdóttir, fyrirliði íslenska liðsins, var eins og aðrir leikmenn liðsins svekkt með að hafa ekki fengið neitt út úr góðum leik liðsins á móti Noregi.

„Mér fannst allir vera að leggja sig hundrað prósent fram og gefa allt sitt í þetta. Við náðum bara ekki að uppskera þessi mörk sem við þurftum. Ég veit ekki alveg af hverju það var. Við náðum ekki að skapa okkur nógu mörg hættuleg færi en við áttum þó nokkur í fyrri hálfleik. Þetta er því ótrúlegt svekkjandi," sagði Katrín Jónsdóttir eftir leikinn.

„Þær voru ekki hættulegri en við í þessum leik. Við áttum meira skilið en 1-0 tap. Stundum er bara boltinn svona og þetta var stöngin út í dag, því miður," sagði Katrín sem segir sigurmarkið hafa komið á erfiðum tíma. "Tímasetningin var svo svekkjandi og að við skyldum ekki náð að halda út hálfleikinn," sagði Katrín.

Hún vildi hrósa íslenskum áhorfendum sem stóðu sig einstaklega vel. „Við erum kannski ekki að vinna út á vellinum en við erum búin að vinna stúkuna. Ég verð að fá að hrósa áhorfendum sem eru búnir að leggja leið sína hingað og hafa stutt þvílíkt við bakið á okkur. Það er frábært að heyra þá syngja þjóðsönginn og ýmsa aðra söngva. Það er ekkert annað lið sem við höfum mætt í keppninni með jafngóða stuðning á bak við sig," sagði Katrín.

Ísland mætir Þýskalandi í lokaleiknum á sunnudaginn. „Ég veit ekki hvort ég sé sú eina sem hefur mætt Þýskalandi eða hvort einhver annar leikmaður hefur gert það. Það verður bara ný áskorun og við ætlum að sýna þar að við eigum erindi í þessa keppni og viljum standa okkur þar," sagði Katrín að lokum.