Papeyjarsmyglið: Óskað eftir áframhaldandi gæsluvarðhaldi

Lögreglan á höfuðborgarsvæðinu hefur óskað eftir framlengingu á gæsluvarðhaldi yfir fjórum mönnum sem voru handteknir vegna Papeyjarsmyglsins svokallaða. Þeir hafa allir verið í varðhaldi frá því snemma í apríl en það rennur út í dag.

Samkvæmt upplýsingum frá yfirmanni fíkniefnadeildar höfuðborgarsvæðisins þá er verið að vinna í því að fá áframhaldandi gæsluvarðhaldsúrskurði yfir þeim en ekki verður ljóst fyrr en síðdegis hvort það gangi eftir í öllum tilvikum.

Mennirnir eru grunaðir um aðild að innflutningi á yfir tvö hundruð kílóum af fíkniefnum til landsins. Efnin fluttu þeir til landsins með skútunni Sirtaki.

Þrír menn voru handteknir í skútunni og svo voru þrír menn teknir höndum á landi. Efnin fundust í bifreið sem einn mannanna ók.