Trapattoni: Heiður að fá að koma með Íra til Ítalíu

Ítalinn Giovanni Trapattoni, þjálfari írska landsliðsins, verður í sviðsljósinu þegar Írar mæta Ítölum í Bari á miðvikudagskvöldið en leikurinn er í undankeppni HM 2010.

„Það er mikill heiður að koma með írska landsliðið til Ítalíu. Við getum sannað að við séum með gott lið með einbeitingu og góðu skipulagi. Það er borin virðing fyrir írska landsliðinu á Ítalíu en það er ekki bara mér að þakka," sagði Trapattoni og ítrekar. „Írland er miklu neðar á Styrkleikalistanum en samt er borin virðing fyrir írskum fótbolta á Ítalíu," segir Giovanni Trapattoni.

Giovanni Trapattoni ætlar að spila til sigurs á móti Heimsmeisturunum. „Ég er stoltur af mínu liði og þetta snýst ekki um það að ná hefndum fyrir mig. Við erum með gott lið og hræðumst ekkert fyrir þennan leik," sagði Giovanni Trapattoni sem þjálfaði ítalska landsliðið frá 2000 til 2004.

Giovanni Trapattoni segir það ekkert vera stórt áfall þótt að leikurinn tapist. „Við höfum ekki stórar áhyggjur af því enda erum við með gott forskot á Búlgaríu og Kýpur. Ég trú því samt alltaf að við getum unnið og við undirbúum okkur til að vinna leikinn," sagði Trapattoni.

Írar hafa aðeins tapað einu sinni í níu leikjum undir stjórn Trapattoni og það tap kom í vináttulandsleik á móti Póllandi.