Moyes: Benfica nýtti marktækifæri sín mjög vel

Everton fékk slæma útreið í Evrópudeild UEFA í kvöld gegn Benfica á Estadio da Luz-leikvanginum og tapaði 5-0 en staðan í hálfleik var 1-0.

Þrjú mörk á rúmum sex mínútum í upphafi síðari hálfleiks gerðu hins vegar út um leikinn en Knattspyrnustjórinn David Moyes hjá Everton reyndi að horfa á björtu hliðarnar í leikslok.

„Ég hefði augljóslega viljað stilla upp mínu sterkasta liði gegn Benfica en ég verð bara að hrósa þeim leikmönnum sem spiluðu í kvöld því þeir reyndu sitt allra besta. Úrslitin eru augljóslega vonbrigði en Benfica sýndi styrk sinn og nýtti marktækifæri sín mjög vel," sagði Moyes en hann gaf nokkrum ungum leikmönnum tækifæri í leiknum og bakverðirnir ungu Dan Gosling og Seamus Coleman fengu á köflum harkalega útreið frá vængmönnum Benfica.

Moyes hrósaði sérstaklega Angel Di Maria í leikslok. „Di Maria sýndi snilldartakta í kvöld og hann hefði gert hvaða bakverði sem er lífið leitt eins og hann spilaði í þessum leik," sagði Moyes.