Brasilía komst á HM með sigri á Argentínu

Diego Maradona og lærisveinar hans í argentínska landsliðinu eiga erfiða baráttu fyrir höndum um að komast á HM eftir að liðið tapaði, 3-1, fyrir Brasilíu á heimavelli í nótt.

Úrslitin þýða að Brasilíumenn eru nú öruggir með HM-sæti sitt en Argentína er í fjórða sæti riðilsins, tveimur stigum á undan Kólumbíu og Ekvador. Fjögur efstu liðin komast beint inn á HM.

Luisao skoraði fyrsta mark Brasilíu með skalla eftir fyrirgjöf Elano úr aukaspyrnu. Markið kom á 24. mínútu en stuttu síðar náði Luis Fabiano að skora eftir að hafa fylgt eftir skoti Maicon.

Jesus Datolo minnkaði muninn fyrir Argentínu í síðari hálfleik með glæsilegu langskoti en aðeins tveimur mínútum síðar tryggði Fabiano Brasilíu sigurinn með sínu öðru marki í leiknum.

„Þetta verður flókið fyrir Argentínu eftir þetta tap - en við verðum að halda áfram. Við verðum að fara nú til Paragvæ og við ætlum að ná í þrjú stig þar þótt það verði erfitt, sérstaklega eftir tapið í dag," sagði Maradona eftir leikinn.

Chile og Paragvæ eru í öðru og þriðja sæti riðilsins í Suður-Ameríku og geta með sigri í sínum leikjum á miðvikudaginn tryggt sér farseðilinn til Suður-Afríku.