Duttu í lukkupottinn og fengu eiginhandaráritanir hjá stelpunum

Þrjár ungar knattspyrnukonur fengu að fylgjast með æfingu kvennalandsliðsins í dag en þær spila allar fótbolta og eru í Finnlandi ásamt mæðrum sínum sem síðan léku allar saman hjá Val. Þær voru að sjálfsögðu meðal áhorfenda þegar íslenska landsliðið mætti Frökkum í gær.

Leikmenn kvennalandsliðsins spörkuðu bolta upp í stúku fyrir Frakkaleikinn og tvær stelpnanna voru svo heppnar að ná í bolta. Þær mættu síðan með boltana á æfinguna og fengu íslensku landsliðskonurnar til að skrifa nöfnin sín á þá.

Stelpurnar heita Snædís Logadóttir, Karen Ósk Bernburg og Kristín Dís Árnadóttir en mæður þeirra eru Bryndís Valsdóttir, Margrét Bragadóttir og Kristín Anna Arnþórsdóttir og urðu allar á sínum tíma Íslandsmeistarar með Val.