Veigar Páll í byrjunarliðinu þegar Nancy sló út Mónakó

Veigar Páll Gunnarsson var í byrjunarliði Nancy þegar liðið vann 2-0 sigur á Eið Smára Guðjohnsen og félögum í Mónakó í franska deildarbikarnum í kvöld. Eiður Smári spilaði fyrsta klukkutímann hjá Mónakó sem tapaði í fyrsta sinn síðan að hann kom til liðsins.

Veigar Páll var í byrjunarliði Nancy í fyrsta sinn á tímabilinu en hann lék í stöðu fremsta miðjumanns og lúrði fyrir aftan framherja Nancy. Veigari var skipt útaf á 66. mínútu eða sex mínútum eftir að Eiður Smári fór útaf.

Julien Feret skoraði fyrra mark Nancy strax á 13. mínútu og það var síðan Senegalinn Issiar Dia sem innsiglaði sigurinn 9 mínútum fyrir leikslok. Nancy er þar með komið áfram í sextán liða úrslit keppninnar.