Sex sjálfstæðismenn hafa ekki gefið upp hagsmunatengsl

Átta þingmenn, þar af sex þingmenn Sjálfstæðisflokksins, hafa enn sem komið er ekki lokið við skráningu á fjárhagslegum hagsmunum sínum.

Þingmenn höfðu frest til gærdagsins til að skrá upplýsingarnar en þær þarf að skrá í sérstaka tölvu á Alþingi og segir Ásmundur Helgason, yfirlögfræðingur Alþingis, að Þór Saari, þingmaður Borgarahreyfingarinnar, hafi lent í vandræðum með að skrá upplýsingarnar í umrædda tölvu. Auk þess hafi Atli Gíslason, þingmaður Vinstri grænna, verið í leyfi og ekki átt kost á því að upplýsa um hagsmunatengsl sín.

Ásmundur segir að sex þingmenn Sjálfstæðisflokksins hafi enn sem komið er ekki lokið við skráningu á fjárhagslegum hagsmunum sínum. Þingmennirnir sem umræðir eru auk formannsins - Bjarna Benediktssonar - Árni Johnsen, Birgir Ármannsson, Jón Gunnarsson, Ólöf Nordal og Tryggvi Þór Herbertsson.

„Ég hef hinsvegar fengið þær upplýsingar að Birgir Ármannsson muni klára þetta sennilega í dag en varðandi aðra veit ég ekki hvað veldur," segir Ásmundur.

Fjármál stjórnmálaflokka, einstakra stjórnmálamanna og hagsmunatengsl hafa lengi verið mikið til umræðu. Forsætisnefnd Alþingis samþykkti í mars reglur um skráningu á fjárhagslegum hagsmunum alþingismanna og trúnaðarstörfum þeirra utan þings. Reglurnar tóku gildi 1. maí en þingmenn ákveða sjálfir hvort þeir upplýsi um hagsmuni sína.

„Þetta er ekki lagaleg skylda og þingið hefur engin úrræði til að knýja menn til að skrá þessar upplýsingar," segir Ásmundur.

Hægt er að nálgast upplýsingarnar á vef Alþingis.