Benítez: Lucas er auðvelt skotmark gagnrýnenda

Rafael Benítez, knattspyrnustjóri Liverpool, segir að miðjumaðurinn Lucas sé auðvelt skotmark gagnrýnenda. Lucas hefur oft verið harðlega gagnrýndur fyrir slælegar frammistöður með félaginu en Benítez segir það ekki sanngjarnt.

Lucas var í dag valinn í landslið Brasilíu sem mætir Argentínu og Chile í undankeppni HM. Lucas hefur byrjað báða deildarleikina með Liverpool í sumar. Hann var gagnrýndur mikið eftir tapið gegn Tottenham en svaraði með góðum leik gegn Stoke sem Liverpool vann 4-0.

Lucas þótti langt frá því versti maður liðsins gegn Tottenham, en lykilmenn eins og Steven Gerrard og Fernando Torres, sem báðir áttu virkilega slakan leik, fengu ekki sömu meðferð.

„Lucas er sterkur andlega," segir Benítez. „En fyrir einhvern á hans aldri (22) fær hann of mikla gagnrýni svokallaðra sérfræðinga í sjónvarpinu. Hann er mjög góður en er samt gagnrýndur harðlega. Ég skil þetta ekki af því að þessir sömu sérfræðingar gagnrýna ekki eldri leikmennina þegar þeir eiga slaka leiki."

„Hann er auðvelt skotmark og kannski þora þeir ekki að gagnrýna stóru leikmennina hérna. En Lucas mun eiga gott tímabil. Hann var einn besti leikmaðurinn á undirbúningstímabilinu og gegn Spurs, þar sem við spiluðum ekki vel, var hann samt einna bestur ásamt Glen Johnson og Pepe Reina," sagði stjórinn.

Og Lucas sjálfur er bjartsýnn. „Ég hef mikla trú á sjálfum mér - þú þarft á því að halda í lífinu, ekki bara í fótboltanum. Hvað sem gerist trúi ég á sjálfan mig og það gerir stjórinn minn líka," sagði landsliðsmaður Brasilíu, Lucas.