Heskey býst við því að Defoe fái að byrja á móti Króötum

Emile Heskey segist skilja það vel ef að Jermain Defoe fái sæti í byrjunarliði Englendinga í leiknum á móti Króötum á miðvikudaginn. Defoe hefur skoraði þrjú mörk í síðustu tveimur landsleikjum eftir að hafa komið inn af bekknum.

„Það væri ekki hægt að kvarta mikið ef við skoðum tölfræðina. Jermain hefur staðið sig frábærlega og hann hefur alltaf skorað þegar hann hefur komið inn á. Það skiptir mestu máli," sagði Heskey.

Heskey hefur ekki skorað mörg mörk fyrir enska landsliðið. Á sama tíma og Defoe hefur skorað 11 mörk í 36 landsleikjum hefur Heskey aðeins náð að skora 7 mörk í 55 leikjum.

„Við erum í samkeppni en þetta er góð samkeppni. Hún kemur manni upp á tærnar því maður verður að standa sig," sagði Heskey.

Fjölmiðlamenn í Englandi velta því nú fyrir sér hvor þeirra Heskey eða Defoe muni spila með Wayne Rooney í framlínu Englendinga sem geta tryggt sér sæti á HM með sigri á Króötum á Wembley.